Escrit qui est au bas de la Ville de Paris.
Paris la tres fameuse, ville source de science, sejour royal, et cité capitalle du royaume de France, situé sur la riviere de Seine, fut premierement habitée & fondée selon Iehan Annius de Viterbe par ung nommé Paris, qui fut filz de Romus descendu de Iaphet venu de Noel, lequel Paris fut XVIIIe roy de la Gaule celtique, & commeça à regner en la creation du monde trois mil VII.C.III.XX et six ans, selon Manethon d'Egipte, et Eusebe ; ou depuis le Deluge VIII.cens.III.XX.XIIII ans et devant l'Incarnation de Jesu-Crist mil IIIIc treze ans & fut appellée Lutesse a cause des boues qui descendoient du mont que l'on dit a present Saincte Geneviefve, aussy que alors l'on n'eusoit de pavé en telle ordre, les roys et prince estoyent payens & ydolatres et tous les habitants, et regnerent longtemps en telle loy, depuis fut appellée Paris a cause peut et en memoire dudit Paris dessus nonnmé, lors commença for a peupler et croistre la ville, tantost apres la mort de Iesu-Crist, veint sainct Denis d'Athenes que St Pol feit crestien et fut evesque a Rome, lequel prescha la foy crestiene parquoy fut decapité au Montmatre par le prevost Fescenius soubz Domician lors Empereux romain, et deslors les crestiens commencerent fort à regner et augmenta la foy dedans Paris, et fut fameuse par les roys crestiens dont le premier fut Pharamont, et depuis les roys feirent construire les eglises et premier St Estienne des Grez apres les autres furent faictes comme Nre Dame de Paris, en la Ste Chappelle en laquelle y a de precieuses reliques, c'est sçavoir la couronne d'espine de la vraye croix grand quantité, le fer de la lance, un clou, et autres, que le roy St Loys aporta & paravant les Roys & princes crestiens vindrent habiter & y ont fondé grands palais et maisons et entre autres le Palais, qui est grand & sumptueuse chose a veoir & tans d'aultres beaulx hostels comme l'on peut veoir, puis il y a l'Université qui est ung tresor crestien, et la Ste Faculté de theologie, consequtivement les sept ars liberaulx, par quoy toutes nations crestienes y vienent pour estudier en nombre infiny & plus habondament & en tout le monde puis y est le siege royal audit Palais, qui est excellente a voir tant de monde ; je tais la grande habondance de vivres qui y vienent affluer & les biens & les gens qui y sont, & tous les jours y arivent, par quoy est digne d'estre en pourtraicture comme appert qui a esté une grande entreprise aux maistres comme pouvez veoir par l'aultre tableau.

2e escrit qui est au milieu.
Ville d'honneur ou tous biens sont comprins
Digne d'avoir tiltre de precellence
Police en toy a longtemps son droict prins,
Pour mettre sus bourgeois par excellence
Tu es garnie et tiens soubz ta puissance
Ce que nature apres Dieu peult pour veoir
Paris te feist construire a sa plaisance
Par quoy tout oeil a desir de te veoir,
Cité de paix, vray repos de Justice
Isle ayant port de consolation
Sejour royal a tous humains propice
Lieu ou faveur n'a juridiction
Pourpris tres sainct dont l'ont faict mention
En plusieurs pais pour les sainctes reliq.s
Qui temoignent n.re redemption
Comme l'on sçait par livres autentiques,
Ne cherchez plus d'Athenes la cité
Pour mettre erreur en abisme profunde
C'est a Paris en l'Université
Que vraye foy son intention fonde,
Ne reclames Rome le chef du monde
Car bruit comun ne s'y veult occuper
Disant tout hault en parolle profunde
Ce qui est vray (Vive paris sans pair)
Paris ethimologice
Paris, parfaict, propice, plantureux,
Ayant, accueil, attratif, amoureux,
Repos, requis, refuge, recepvable,
Joignant en soy justice, inestimable
Secours, soubdain, sentement, savoureux.

3e et dernier escrit.
Pour mieulx & plus facilement congnoistre & donner a entrendre a tous ceulx qui ont veu & ne jamais veirent la ville de Paris, et la magnificence d'icelle & comme ainsy fut par le privilege & congé du roy a nous donné en désir & affection de mettre en pourtraicture & en plate forme lad.t ville par art de geometrie & vraye mesure sans user de perspective que bien peu a cause que le tout ne se fut veu ne monstre comme il faict, sy avons compassé & mesuré de certain lieu en certain lieu, & bien noté affin de donner clerement a entendre les longueurs largeurs & closture d'icelle, donq pour ce faire fault noter ceste presente figure cy figurée qui est reduicte de majeur a mineur laquelle a trois poulces de longt et vault ou contient XXVII toises dont chacune toise à VI pieds de long & chacun pied a XII poulces, le tout a la mesure de Paris, notez que la plus grande partie dudict & tour depuis la tour de Beilly iusque a la tour du bois IIIIxxXV fois la susd.t mesure, et l'autre partie l'université qui est aussy de la ville a detour depuis la Tournel jusquez a la grosse tour pres l'hostel de Nesle LVII fois la susd.t mesure et la riviere de Seine a de largeur par hault VIII fois la susd.t mesure par icelle mesme mesure Ve sur le bas qui est pour la mesure totalle tant de la ville cité université et riviere CLXV fois et par icelle mesure pouvez sçavoir la longeur & la largeur de ce qui s'appelle cité ou isle, en laquelle isle, sont mis plus.rs sumptueux edifices comme la grande esglise Nre Dame, le Palais & Ste Chappelle,qui est tres digne chose, l'Hostel Dieu & plus.rs esglises laquelle isle ou cité est située au milieu des deux susd.te partie environée de la d.te riviere ou fleuve de Seine, et y sont toutes les rues sans faillir et toutes les esglises bien nombrés & nommées, mais il y a plus de maisons en lad.te ville que ce pourtraict a cause que la mesure dessus dicte est trop petite, par quoy n'avons peu faire le toute des maisons lesquelles eussent esté trop petites & quasi incongnües, or est ainsy que dedans ladicte ville cité & université y a plus.rs esglises, collegialles paroisses chappelles religions & couvents tans d'hommes que de femmes & po.r mieulx le tout congnoistre avons faict marqué a ung chacun et premier pour les esglises prébendéez & les esglises parochialles & les religions d'hommes & religions de femmes, & les colleges & les chappelles & les quattres mendians, les hostelz des princes, prelatz, pontz, & isles sont nommées chacun en son lieu, et le tout sans avoir rien obmis.