Les religieulx, prieur et convent de Sainct-Guillaume, dicts des blans-manteaulx, sont tenus de dire et celebrer par chascun jour, heure de huict heures, par l’un des religieulx profez dudict monastere une messe basse et icelle sonner et tinter a divers coups a l’instant que ladicte heure sera sonnée, pour et a l’intencion de feu noble homme maistre Jehan des Plantes, en son vivant conseiller du roy nostre sire en la court de parlement, doyen de gaige, fils et heritier de feu noble homme maistre Philipes des Plantes, en son vivant aussy conseiller en ladicte court, et damoiselle Jehanne Le Prevost, sa femme; et oultre dire et celebrer par chascun an quatre obits et a chascun d’iceulx dire vigilles a neuf pseaulmes et neuf leçons, laudes, commendaces et une grande messe a diacre et soubzdiacre, et, en la fin d’icelle, libera me domine, le pseaulme de profundis et les oraisons a ce pertinentes, sur la sepulture ou lesdicts deffuncts sont enterrez, qui est en la nef de ladicte eglise, pres la porte par laquelle on entre au cœur; et a chascun d’iceulx obits faire la representation sur icelle tumbe, garnye de quatre cierges de cyre ardens durant lesdicts quatre obits et services, et aussy fournir deux cierges allumez sur l’autel, et tous ornemens et aultres choses necessaires a celebrer lesdicts obits et services aux despens desdicts religieulx, et durant iceulx sonner leurs cloches en la maniere accoustumée quant ils celebrent services pour les trespassez. le premier desquels obits doibt estre dict le xvii^e de febvrier que deceda maistre Adam des Plantes, frere dudict fondateur; le second le jeudy apres les feries de la Pentecoste; le tiers le second jour de septembre, auquel jour deceda ledict fondateur; le quart le jeudy de la sepmaine des quatre temps apres la Saincte-Croix; et, pour ce faire, ledict des Plantes leur a donné et délaissé une maison contenant plusieurs corps d’hostels, court, jardin, assise tant en la vieille rue du Temple que en la rue de Paradis, comme appert par les lettres de ce faictes et passées par devant Loys Drouet et Pierre Jacquet, notaires au Chastelet de Paris, le dernier jour de mars mil cinq cens huict, avant pasques.
D’oultre sont tenus lesdicts religieulx dire et celebrer par chascun an deux obits et faire des representations telles que dessus pour et a l’intention de ladicte damoiselle Jehanne Le Prevost, l’un le vi^e jour d’apvril que deceda maistre Philippes des Plantes, son mary, l’aultre le xxii^e jour de mars que icelle damoiselle deceda ; pour lesquels ladicte damoiselle a cédé et délaissé plusieurs rentes, comme appert par lettres faictes et passées par devant les dessusdicts notaires, le ix jour de febvrier mil cinq cens cinq.
Requiescant in pace.